Ditën e dielë, datë 4 gusht 2024, qytetarët e Bashkisë Himarë ushtruan të drejtën e votës për të zgjedhur kryetarin e bashkisë.
36 Qendrat e votimit u hapën në orën 7:00 të mëngjesit sipas procedurave të përcaktuara nga Kodi Zgjedhor dhe identifikimi i zgjedhësve u bë përmes pajisjes elektronike të identifikimit (PEI).
Procesi i votimit u zhvillua i qetë dhe nuk pati problematika që cënojnë integritetin e procesit zgjedhor.
Në orën 19:00 përfundoi orari i votimit për zgjedhjet e pjesshme për Kryetarin e Bashkisë Himarë. Qendrat e votimit janë mbyllur në të gjithë territorin e bashkisë.
Procesi i votimit në 36 QV ka vijuar i qetë ndërkohë që zgjedhësit janë identifikuar elektronikisht dhe sistemi PEI ka rezultuar krejt i suksesshëm.
KQZ e ndoqi në dinamikë ecurinë e procesit, duke ndërhyrë në rastet kur u kërkua asistencë nga ana e Komisionerëve të Qendrave të Votimit.
Nga informacionet paraprake dhe raportimi i 36 Qendrave të votimit, në zgjedhjet për Kryetar të Bashkisë Himarë të datës 4 gusht 2024, votuan 8678 zgjedhës, ose 37.61% e totalit të 23.074 zgjedhësve në listë.
Komisionet e QV dorëzuan kutitë e votimit dhe materialet zgjedhore, së bashku me pajisjet e identifikimit elektronik (PEI) dhe kamerat monitoruse të QV, në KZAZ-në nr. 88. KZAZ nuk konstatoi asnjë kuti të parregullt votimi.
Pas dorëzimit të materialeve zgjedhore nga 36 KQV në KZAZ, Komisioni Qendror i Zgjedhjeve trajnoi sërisht anëtarët e grupeve të numërimit.
U trajnuan 8 grupe numërimi, nga të cilat 4 GNV janë grupet e para të numërimit dhe 4 grupet e dyta të numërimit.
Në Vendin e Numërimit të Votave u vendosën 4 tavolina numërimi, në të cilat kishin të instaluar kamerat monitoruese/regjistruese të fletëve të votimit gjatë procesit të vlerësimit të votave.
Procesi i numërimit të votave filloi në orën 00:37 minuta të ditës së Hënë, datë 05.08.2024.
Procesi i numërimit dhe vlerësimit të votave u zhvillua pa ndërprerje, i qetë dhe pa incidente, i vëzhguar nga shoqëria civile, vëzhgues të përfaqësuesve të partive politike dhe media.
Procesi u monitorua nga stafi teknik i KQZ-së dhe rezultatet paraprake u transmetuan në kohë reale në faqën zyrtare të internetit të KQZ-së dhe Aplikacionin KQZ.
Numërimi i votave u mbyll në orën 06:39 minuta të ditës së Hënë.
Rezultate paraprake për 36 qendrat e votimit:
- Kandidati i propozuar nga subjekti zgjedhor “Partia Socialiste e Shqipërisë”, z. Vangjel Tavo ka marrë 5022 vota (58.62%).
- Kandidati i propozuar nga subjekti zgjedhor, koalicioni “Bashkë Fitojmë”, z. Petraq Gjikuria ka marrë 3545 vota (41.38%).
