Në Prishtinë nisi aktiviteti e përbashkët tre-ditor mes Komisionit Qendror të Zgjedhjeve të Shqipërisë dhe të Komisionit Qendror të Zgjedhjeve të Kosovës për shkëmbimin e praktikave zgjedhore dhe sfidat me të cilat përballemi në proceset e ardhshme zgjedhore.
Kryesuesi i KQZ-së së Kosovës z. Kreshnik Radoniqi vuri theksin tek bashkëpunimi i mirë mes dy institucioneve, i cili në shumë raste është treguar me ndihmë konkrete dhe mbështetje logjistike. Z. Radoniqi solli në vëmendje huazimin e kamerave për nevoja të Qendrës së Numërimit dhe Rezultateve gjatë zgjedhjeve lokale të viti 2021 dhe gjatë procesit të votimit të datës 21 prill 2024.
Komisioneri Shtetëror i Zgjedhjeve, z. Ilirjan Celibashi theksoi se bashkëpunimi mes dy institucioneve është forcuar dhe ka dhënë rezultate të prekshme për të dy palët. Celibashi theksoi se dy KQZ-të kanë eksperienca sa të ngjashme aq edhe të ndryshme në proceset zgjedhore, ndaj shkëmbimi i këtyre përvojave do të ndihmojë në identifikimin e sfidave dhe marrjen e masave për mirëorganizimin e proceseve zgjedhore.
Komisioneri solli në vëmendje votimin nga jashtë të shtetasve të Kosovës, përvojë e cila do t’i shërbejë KQZ-së së Shqipërisë në përgatitjen e procesit të votimit nga jashtë të shtetasve shqiptarë në 2025.
Qëlllimi i këtij aktiviteti të përbashkët është forcimi i bashkëpunimit mes dy institucioneve dhe shkëmbimi i përvojave të deritanishme mbi informimin dhe edukimin e votuesve, identifikimin elektronik të tyre, raportimin digjital të financave të partive politike dhe votimit nga jashtë.
