Komisioneri Shtetëror i Zgjedhjeve miratoi rregullat teknike të administrimit nëpërmjet Platformës Elektronike të Regjistrimit të kërkesave për regjistrimin e zgjedhësve nga jashtë territorit të Republikës së Shqipërisë.

Vendimi parashikon rregulla të përgjithshme të përcaktuara në Ligj sa i takon shfaqjes së vullnetit të zgjedhësve nga jashtë vendit për t’u regjistruar në listën e zgjedhësve nga jashtë vendit, të cilët, me qëllim ushtrimin e të drejtës së votës për zgjedhjet për Kuvend, duhet të paraqesin një kërkesë individuale për regjistrim përmes Platformës Elektronike të Regjistrimit (PER). Gjithashtu, parashikohen rregullat e posaçme tekniko-proceduriale që lidhen me krijimin, administrimin dhe funksionimin e “PER”, si dhe rregullat teknike për shqyrtimin e kërkesave për regjistrim në “PER”.

Platforma do të krijohet, mirëmbahet dhe përditësohet nga KQZ dhe do të jetë e disponueshme dhe e përdorshme në të dy versionet, desktop dhe mobile, pa u kushtëzuar nga lloji i pajisjes që do të përdorë zgjedhësi.

“PER” do të ketë dy module kryesore: Moduli i regjistrimit dhe Moduli i shqyrtimit të kërkesave, të cilët do të mundësojnë një proces të sigurt dhe të besueshëm për menaxhimin e kërkesave për regjistrim.

Në vendim përcaktohen rregullat në lidhje me mirëmbajtjen, mbikëqyrjen dhe auditimin e “PER”. Për të siguruar transparencë dhe qasje të të gjitha palëve, iu njihet e drejta: partive politike, organizatave joqeveritare shqiptare/huaja, përfaqësuesve të shteteve të huaja të akredituara dhe medias, të njihen me të gjitha elementet dhe karakteristikat teknike të “PER”, veçanërisht gjatë proceseve të testimit paraprak operacional, kontrollit apo auditimit të saj.

Në mbledhjen e sotme u miratua edhe programi i edukimit, informimit dhe ndërgjegjësimit të zgjedhësve nga jashtë vendit për zgjedhjet për Kuvend të vitit 2025. Programi përcakton objektivat dhe hapat konkrete që do të ndërmerren për realizimin e procesit të votimit nga shtetasit me të drejtë vote, të cilët, në ditën e zgjedhjeve për Kuvendin, ndodhen jashtë vendit. Duke qenë se procesi i votimit nga jashtë vendit zhvillohet për herë të parë, programi për edukimin e zgjedhësve jashtë vendit synon të ndërgjegjësojë qytetarët shqiptarë jashtë vendit për rëndësinë e votës së tyre dhe rëndësinë e pjesëmarrjes në zgjedhjet për Kuvend 2025.

Për realizimin e programeve ndërgjegjësuese dhe edukuese, KQZ-ja do të bashkëpunojë me partnerët vendas dhe ndërkombëtarë, përfshirë shoqërinë civile. Përfshirja e tyre në realizimin e këtyre programeve përmes ekspertizës, kontributit dhe mbështetjes vlerësohet si një komponent i rëndësishëm për mbarëvajtjen e këtij procesi.