Komisioni Qendror i Zgjedhjeve dhe Prezenca e OSBE-së në Shqipëri organizuan sot tryezën e diskutimit teknik “Zgjedhjet 2025: Përmirësimi i Fshehtësisë së Votimit dhe Parandalimi i Frikësimit të Votuesve – Sfida dhe Mundësi”.

Paneli dhe të ftuarit përfshinin Ambasadorin e Prezencës së OSBE-së, Michel Tarran, Zëvendësdrejtorin e Përgjithshëm të Policisë së Shtetit, z. Sokol Bizhga, z. Alexandru Berlinschii, ekspert nga ODIHR, zj. Erinda Skëndaj, nga Komiteti Shqiptar i Helsinkit, z. Kristaq Kume, nga INSIZ, z. Dritan Taulla nga KRIIK. Në aktivitet morën pjesë edhe anëtarë të Komisionit Rregullator dhe Komisionit të Ankimimeve dhe Sanksioneve të KQZ-së, përfaqësues të institucioneve dhe partive politike, si dhe organizata kyçe ndërkombëtare dhe të shoqërisë civile.

Në kuadër të përgatitjeve për zgjedhjet parlamentare të vitit 2025 dhe si përgjigje ndaj rekomandimeve të OSBE/ODIHR, aktiviteti u përqendrua në forcimin e garancive procedurale për të siguruar fshehtësinë e votimit dhe parandalimin e frikësimit të votuesve. Temat e diskutuara përfshinë:

• Strategji për përmirësimin e fshehtësisë së votimit dhe mbrojtjen e konfidencialitetit të votuesve.
• Masa për parandalimin e frikësimit të votuesve dhe garantimin e një mjedisi të sigurt votimi.
• Roli i administratës zgjedhore dhe aktorëve të tjerë kyç në ndërtimin e besimit.
• Fuqizimi i votuesve përmes edukimit dhe aksesit në informacione të besueshme.

Duke nxitur bashkëpunimin dhe dialogun, tryeza teknike kontribuoi në formësimin e një procesi zgjedhor të fortë dhe gjithëpërfshirës për zgjedhjet e vitit 2025 në Shqipëri.