Në bashkëpunim me Prezencën e SOBE-së në Shqipëri, Komisioni Qendror i Zgjedhjeve finalizoi një dialog transparent disa-mujor mbi administrimin e procesit të ardhshëm zgjedhor, me tryezën e diskutimit dyditor me temë: “Zgjedhjet 2025: Çfarë duhet të bëjë KQZ për të përmirësuar administrimin e zgjedhjeve?”
Në këtë aktivitet morën pjesë anëtarë të Komisionit Rregullator dhe të Komisionit të Ankesave dhe Sanksioneve (KAS) të KQZ-së, përfaqësues të partive politike, medias dhe organizatave të shoqërisë civile.
Çështjet kryesore të diskutuara përfshinë:
- Raportimi i institucioneve publike dhe administrimi i denoncimeve
- Sfidat në administrimin e zgjedhjeve
- Përmirësimi i edukimit të zgjedhësve
- Implementimi i votimit elektronik
- Monitorimi i medias gjatë fushatës zgjedhore dhe forcimi i bashkëpunimit me median
- Sfidat për mundësimin e votimit nga jashtë vendit
Komisioneri Shtetëror i Zgjedhjeve, Ilirjan Celibashi falenderoi Prezencën e OSBE në Tiranë dhe Ambasadorin Michel Tarran për mbështetjen në realizimin e serisë së këtyre aktiviteteve.
Ky aktivitet është pjesë e projektit të Prezencës së OSBE-së në Shqipëri:“Mbështetje për Reformën dhe Procesin Zgjedhor në Shqipëri”, i financuar nga Suedia, Zvicra, Misioni i SHBA-ve në OSBE dhe Polonia.
