Në mjediset e Komisionit Qendror të Zgjedhjeve u mbajt një takim me përfaqësues të partive politike për të diskutuar testimin operacional dhe teknik të Platformës Elektronike të Regjistrimit (PER). Kjo platformë synon të mundësojë votimin nga jashtë për qytetarët shqiptarë që jetojnë jashtë territorit të Republikës së Shqipërisë në zgjedhjet e 11 majit 2025.

Gjatë takimit, u kryen testime të reja për funksionalitetet kryesore të platformës, duke përfshirë tre komponentët kryesorë: Hapësira e Zgjedhësit, Moduli për Shqyrtimin e Kërkesave, dhe Paneli Statistikor në Kohë Reale. Përfaqësuesit e partive politike patën mundësinë të shihnin skenarë të ndryshëm të regjistrimit dhe të njiheshin me funksionalitetet e platformës në trajtimin e rasteve të ndryshme.

Platforma Elektronike e Regjistrimit për votuesit nga jashtë do të jetë e aksesueshme në aplikacionin dhe faqen zyrtare të KQZ-së, duke ofruar përdorim të thjeshtë nga çdo pajisje elektronike që disponojnë qytetarët. Çdo veprim ose komunikim i kryer nga zgjedhësit në platformë do të njoftohet automatikisht në llogarinë e tyre, si dhe në numrin e telefonit ose adresën e email-it të përdorur gjatë regjistrimit.