Komisioneri Shtetëror i Zgjedhjeve në seancë publike caktoi detyrat dhe përgjegjësitë e auditëve teknicienë për verifikimin e veprimeve të realizuara nga KQZ-ja për regjistrimin e shtetasve që votojnë nga jashtë territorit të Republikës së Shqipërisë, për zgjedhjet për Kuvend të datës 11 maj 2025.

Dy auditët teknicienë të emëruar do të kryejnë:

• auditimin e kuadrit ligjor dhe rregullator të Platformës Elektronike të Regjistrimit (PER),
• auditimin e arkitekturës së sistemit dhe bazës së të dhënave
• auditimin e procesit të regjistrimit dhe identifikimit të votuesve;
• testimin e integritetit të sistemit;
• verifikimin e performancës së sistemit, gjurmimin dhe auditimin e ndryshimeve në të dhëna, e të tjerë.

Auditët teknicienë do të përgatisin raport me gjetjet dhe do të japin rekomandime për përmirësime, të propozojnë masa korrigjuese për çdo problem të identifikuar, të përgatisin një plan veprimi për të adresuar dobësitë dhe për të përmirësuar sigurinë dhe saktësinë e sistemit.

Sot, gjithashtu u caktua struktura dhe masa e shpërblimit për administratën zgjedhore, si dhe u miratua formati dhe specifikimet e vulës së Komisionit të Zonës së Administrimit Zgjedhor, të vulës së Komisionit të Qendrës së Votimit, vulës së Kryetarit të Komisionit të Qendrës së Votimit dhe të vulës rezervë të Komisionit të Qendrës së Votimit, për zgjedhjet për Kuvendin të datës 11 maj 2025.

Gjithashtu, u plotësuan vakancat në 6 këshillat bashkiak si më poshtë vijon:

1. Këshilli i Bashkisë Fier, me kandidatin e Partisë Socialdemokrate, zj. Alesia Koroveshi.
2. Këshilli i Bashkisë Kukës, me kandidatin e Partisë Bindja Demokratike, z. Rustem Ahmetaj.
3. Këshilli i Bashkisë Pukë, me kandidatin e Partisë Socialdemokrate, zj. Leze Kolaj.
4. Këshilli i Bashkisë Kamëz, me kandidatin e Partisë Republikane Shqiptare, zj. Albana Xhika.
5. Këshilli i Bashkisë Kamëz, me kandidatin e Partisë Socialiste të Shqipërisë, z. Sajmir Kurti.
6. Këshilli i Bashkisë Tiranë, me kandidatin e Partisë Socialiste të Shqipërisë, z. Sead Kazanxhiu.
7. Këshilli i Bashkisë Vorë, me kandidatin nga lista shumemërore e Partisë Socialiste të Shqipërisë, z. Elisabeta Vehbi Haka”.

Në seancë u shqyrtua rezultati i verifikimit të Prokurorit të Përgjithshëm për subjektin vetëdeklarues z. Arbis Vjerdha, anëtar në Këshillin e Bashkisë Shkodër, i propozuar nga subjekti zgjedhor Koalicioni A.S.E (Partia Demokracia Sociale), për zgjedhjet për organet e qeverisjes vendore të datës 30 qershor 2019. Komisioneri deklaroi të përfunduar dhe pa vendim përfundimtar procedurën administrative, pasi vlerësohet se ka humbur objekti dhe qëllimi i procedurës administrative të filluar përpara ditës së zgjedhjeve.

Me kërkesë të Partisë Socialiste u shty shqyrtimi i projektvendimit “Për miratimin e Rregullores për shqyrtimin nëpërmjet PER të kërkesave për regjistrim të zgjedhësve nga jashtë territorit të Republikës së Shqipërisë, për zgjedhjet për Kuvend, të datës 11 maj 2025”.

Vendimmarrja për rezultatin e verifikimit të Prokurorit të Përgjithshëm për subjektin vetëdeklarues z. Erin Gjoni, anëtar në Këshillin e Bashkisë Lezhë, i propozuar nga subjekti zgjedhor Partia Socialdemokrate, për zgjedhjet për organet e qeverisjes vendore të datës 14 maj 2023, u shty për t’i dhënë kohë subjektit të interesuar për paraqitjen e dokumentacionit shtesë.