Komisioneri Shtetëror i Zgjedhjeve, z. Ilirjan Celibashi priti sot Ambasadorin Britanik në Tiranë, z. Nicholas Abbott me të cilin zhvilloi një bisedë të hapur mbi përgatitjet e KQZ për Zgjedhjet për Kuvendin e Shqipërisë të datës 11 Maj 2025.

Pasi diskutuan mbi zhvillimet dhe mjedisin politik në këtë periudhë parazgjedhore, u thelluan mbi temën e votimit nga jashtë dhe sfidat e organizimit të këtij procesi.

Gjatë takimit, Komisioneri dhe Ambasadori ndanë pikëpamjet dhe përpjekjet mbi çështje me rëndësi, si masat e marra për parandalimin e shitblerjes së votës, shmangies së abuzimit të burimeve shtetërore në fushatë dhe rritjen e rolit të institucioneve të tjera në luftën kundër krimeve zgjedhore. U ndalën edhe tek plotësimi nga ana e KQZ të rekomandimeve të OSBE/ODIHR dhe nevojës së implementimit të plotë të rekomandimeve që kërkojnë ndërhyrje legjislative nga Kuvendi.

Diskutuan në detaje për risitë e Platformës së Raportimit Financiar dhe promovimin e rolit mbikqyrës të shoqërisë civile mbi financimet zgjedhore.

KSHY dhe Ambasadori Abbott dakordësua rëndësinë unike të procesit të ardhshëm zgjedhor që lidhet me anëtarësimin e plotë të Shqipërisë në BE.

KOmisioneri Celibashi e falenderoi Ambasadorin e Mbretërisë së Bashkuar për bashkëpunimin dhe mbështetjen e fortë ndaj KQZ dhe vijimin e nismave të përbashkëta për fuqizimin e institucionit.