Komisioneri Shtetëror i Zgjedhjeve, z. Ilirjan Celibashi mikpriti sot në KQZ, Ambasadoren e Kanadasë për Shqipërinë, zonjën Elissa Golberg, me të cilën zhvilloi një takim tejet miqësor dhe informues.
Bashkëbiseduan në detaje mbi përgatitjet e procesit të ardhshëm zgjedhor dhe shifrat e rëndësishme të regjistrimit të zgjedhësve nga jashtë.
Ambasadorja Golberg u interesua në hollësi për regjistrimin si votues nga jashtë të shqiptarëve me vendqëndrim në Kanada dhe vlerësoi punën e KQZ dhe platformën e regjistrimit PER. Si vend drejtues i Mekanizmit të Reagimit të Menjëhershëm ndaj goditjeve kibernetike dhe ndërhyrjeve të huaja të grupimit të vendeve G-7, Ambasadorja Golber ofroi kontributin e Kanadasë për identifikimin e rreziqeve potenciale krahas mbrojtjes që vetë PER ka në funksionim.
Gjithashtu zonja Golberg u interesua për implementimin e rekomandimeve të OSBE/ODIHR dhe njohu KQZ me projektin e mbështetur nga Qeveria Kanadeze për edukimin zgjedhor të votuesve për herë të parë. E falenderova Ambasadoren e Kanadasë për gjithë kontributin, ndihmën dhe vlerësimin institucional.
Zonja Elissa Golberg shërben si Ambasadore e Kanadasë në Itali, Ambasadore e Kanadasë në Shqipëri dhe San Marino, Komisionere e Lartë për Maltën dhe Përfaqësuese e Përhershme e Kanadasë pranë Agjencive të OKB-së në Romë (IFAD, FAO, WFP).
