Sot, Komisioneri Shtetëror i Zgjedhjeve në seancë publike vlerësoi raportin mbi veprimtaritë publike për periudhën 09 shkurt – 15 shkurt 2025. Komisioneri vendosi fillimin e procedimit administrative ndaj:
- Ministrisë së turizmit dhe Mjedisit
- KESH sh. a
- Shtabit të Përgjithshëm të Forcave të Armatosura
Gjithashtu, vlerësoi raportet e monitoruesve të fushatës zgjedhore për periudhën e monitorimit 10 deri më 15 shkurt 2025.
Për këtë periudhë, monitoruesit kanë dorëzuar 96 raporte monitorimi. Nga shqyrtimi dhe vlerësimi që u është bërë raporteve të monitorimit, janë evidentuar 11 aktivitete nga partitë politike dhe 33 zyra te hapura për zhvillimin e aktiviteteve përgatitore të fushatës zgjedhore për zgjedhjet për Kuvend të datës 11 maj 2025. Monitoruesit e fushatës zgjedhore nuk kanë konstatuar shkelje.
U shqyrtuan administrativisht:
- Denoncimi me nr. 5, datë 10.02.2025, të depozituar nga Partia Demokratike. KSHZ vendosi pushimin e hetimit administrative për Ministrin e Infrastrukturës dhe Energjisë, Ministrin e Arsimit dhe Sportit, Ministrin e Turizmit dhe Mjedisit, Ministrin e Shtetit për Marrëdhëniet me Parlamentin, Nënkryetarin e Kuvendit të Shqipërisë.
- Denoncimi me nr. 9, datë 10.02.2025, depozituar nga Partia Demokratike. KSHZ vendosi të shtyjë seancën publike, për shkak se duhet të plotësohet denoncimi me subjekt konkret.
- Denoncimi me nr. 10, datë 10.02.2025, depozituar nga Partia Demokratike ndaj Kryetarit të Bashkisë Mat dhe ndaj Ministrit të Shtetit për Rininë dhe Fëmijët. Shpallja e vendimit do të bëhet në seancën e rradhës.
- Denoncimi me nr. 11, datë 11.02.2025, depozituar nga Koalicioni për Reforma, Integrim dhe Institucione të Konsoliduara (KRIIK) ndaj Ministrit të Arsimit dhe Sportit, Ministrit të Financave, Ministrit të Ekonomisë, Kulturës dhe Inovacionit, Ministrit të Infrastrukturës dhe Energjisë dhe Ministrit të Brendshëm. Shpallja e vendimit do të bëhet në seancën e radhës.
