Sot, Komisioni Rregullator shqyrtoi projektvendimin “Për disa shtesa dhe ndryshime në vendimin nr. 13, datë 6.4.2021, të Komisionit Rregullator “Për përcaktimin e rregullave për raportimin financiar të subjekteve zgjedhore, kontrollin dhe verifikimin e financimeve dhe shpenzimeve të tyre gjatë fushatës zgjedhore”.
Ky vendim relflekton ndryshimet e fundit të Kodit Zgjedhor si dhe përshtat raportimin financiar online në Platformën Elektronike të Raportimit Financiar. Vendimi përfshin formatin për bilancin e aseteve dhe detyrimeve të partisë politike për periudhën nga dekretimi i datës së zgjedhjeve deri në datën e zgjedhjeve, raportimin financiar online për fushatën zgjedhore nga subjektet zgjedhore nëpërmjet Platformës Elektronike të Raportimit Financiar, mundësinë e audituesi ligjor për të dorëzuar projekt-raportin e auditimit subjektit zgjedhor, të cilit i jepet mundësia për t’u njohur paraprakisht me gjetjet nga auditimi i pasqyrave financiare dhe për t’ju përgjigjur me observacione ose materiale shtesë, detyrimi dhe përgjegjësia e dorëzimit të raportit financiar për kandidatët e listave shumemërore, e të tjerë.
Gjithashtu, u shqyrtua projektvendimi “Për disa ndryshime në vendimin nr. 18, datë 14.4.2021, të Komisionit Rregullator “Për miratimin e udhëzuesve për mënyrën e raportimit financiar nga partitë politike, kandidatët e listave shumemërore dhe kandidatët e propozuar nga zgjedhësit për fushatën zgjedhore për zgjedhjet për Kuvendin e Shqipërisë”.
Risi e këtij vendimi janë:
- Përfshirja e Platformës Elektronike për raportimin financiar;
- Në rast koalicioni kandidatët e listave shumemërore dorëzojnë raportet e tyre financiare tek kryefinancieri i partisë të caktuar nga partitë politike përbërëse të koalicionit;
- Përfshirja e vetëfinancimit të kandidatëve të listave shumemërore të partisë politike ose koalicionit zgjedhor të regjistruar si subjekte zgjedhore deri në shumën 3 milion lekë, sipas nenit 92/2, pika 3/1, e Kodit Zgjedhor, i ndryshuar.
