Komisioneri Shtetëror i Zgjedhjeve z. Ilirjan Celibashi mori pjesë në prezantimin e gjetjeve të monitorimit mbi përdorimin e burimeve shtetërore në periudhën parazgjedhore të zhvilluar nën projektin “Forcimi i Transparencës Zgjedhore në Shqipëri” (SETA).
Në aktivitet morën pjesë përfaqësueses të organizatave vendase dhe ndërkombëtare të angazhuara në monitorimin e zgjedhjeve të 25 prillit.
Qëllimi i aktivitetit ishtë diskutimi mbi ecurinë e deritanishme të zbatimit të dispozitave të Kodit Zgjedhor për aktivitetet e ndaluara për tu zhvilluar dhe promovuar 4 muaj deri në ditë e zgjedhjeve.
Komisioneri shtetëror, Z. Ilirjan Celibashi, theksoi në fjalën e tij vlerësimin për rolin që po luan projekti SETA për monitorimin e veprimtarive të ndaluara, por edhe mbështetjen për aftësimin e stafit të KQZ për të zbatuar detyrimet e reja të ngarkuara nga Kodi Zgjedhor. Takimin e përshëndeti gjithashtu, znj. Guusje Korthals Altes, ambasadore e Mbretërisë së Vendeve të Ulta në Tiranë, e cila nënvizoi rëndësinë e angazhimit të shoqërisë civile dhe qytetarëve në transparencën e organizimit të zgjedhjeve, duke garantuar standartet e pritshme për zgjedhje të lira dhe të ndershme.
Dy raportuesit zj. Gerta Meta dhe z. Isuf Shehu, prezantuan në këtë aktivitet platformën e databazës elektronike monitorimi.asp.al, e cila është bërë e mundur nga projekti SETA dhe përmban gjetjet e monitorimit të raportimeve të veprimtarive promovuese të zyrtarëve qendrore dhe vendorë pranë ndërfaqes përkatëse të KQZ si dhe mbikqyrjes së aktiviteteve të tyre publike nga monitoruesit në terren.
Projekti zbatohet nga ASP në partneritet të ngushtë me KQZ, falë mbështetjes së Ambasadës së Mbretërisë së Vendeve të Ulëta dhe projektit të përbashkët të Këshillit të Evropës dhe Bashkimit Evropian “Aksioni kundër Ekonomik Krimi në Shqipëri”.
