Komisioneri Shtetëror i Zgjedhjeve në mbledhjen e ditës së sotme, miratoi sasinë e fletëve të votimit që do të prodhohen për çdo qendër votimi për zgjedhjet e datës 25 prill 2021. Gjithsej do të prodhohen 3.660.647 fletë votimit.
Pas shqyrtimit të dokumentacionit vendosi plotësimin e vakancave të krijuara në këshillat bashkiak, me kandidatët si më poshtë:
- Migena Albert Shima, këshilli i kashkisë Cërrik, kandidate nga lista shumemërore e Partisë Socialiste;
- Natirda Dritan Aliaj, këshilli i bashkisë Mallakastër, kandidate nga lista shumemërore të Partisë Demokracia Sociale;
- Elsa Gjergj Gazulla, këshilli i bashkisë Lezhë, kandidate nga lista shumemërore të Partisë Socialiste;
- Mynyr Tahir Bekshiu, këshilli i bashkisë Kavajë, me kandidat nga lista shumemërore të Partisë G 99;
- Nin Mark Curraj, këshilli i bashkisë Vau-Dejws, kandidat nga lista shumemërore të Partisë Socialdemokrate e Shqipërisë;
- Visar Pashk Alia, këshilli i bashkisë Lezhë, kandidat nga lista shumemërore të Partisë Socialiste;
Komisioneri shqyrtoi rezultatet e verifikimit të thelluar të Prokurorisë së Përgjithshme për ish-funksionarin publik, z. Ermal (Agustin) Tetem Hasimaj, në zbatim të ligjit 138/2015. Komisioneri vendosi të deklarojë të përfunduar procedurën administrative pa vendim përfundimtar për shkak të dorëheqjes nga funksioni i këshilltarit të bashkisë Mallakastër të z. Hasimaj.
Gjithashtu, miratoi vëzhguesit afatgjatë të Shoqatës për Kulturë Demokratike, Rrjetit Evropian të Organizatave të Monitorimit të Zgjedhjeve (ENEMO), vëzhguesit afatgjatë dhe afatshkurtër të fondacionit “Instituti Shqiptar për Zhvillimin e Sistemit të Zgjedhjeve”, si edhe gazetarët e qendrës “Media Center Albania”, portalit “Alba News”, “Light Studio Agency (LSA)”, televizionit “Vizion Plus”, televizionit “Media Nord”, për vëzhgimin e zgjedhjeve për Kuvend të datës 25 prill 2021”.
Në mbledhjen e sotme u miratua dhe një ndryshim në vendimin nr. 148, datë 16.03.2021 “Për caktimin e Vendit të Numërimit të Votave”.
Shqyrtimi i projektvendimit “Për caktimin e partive politike që do të propozojnë anëtarin e tretë dhe të katërt të grupeve të numërimit të votave, për zgjedhjet për Kuvend të datës 25 prill 2021″, u shty për në mbledhjen e ardhshme.
