Komisioneri Shtetëror i Zgjedhjeve, z. Ilirjan Celibashi u takua me Ministrin e Brendshëm të Greqisë, z. Makis Voridis ku bisedoi mbi mekanizmat zgjedhorë që garantojnë votën e rezidentëve shqiptarë jashtë vendit.
Në takimin e mbajtur në Ministrinë e Brendshme të Republikës Greke me zyrtarin më të lartë të administrimit të zgjedhjeve të vendit fqinj, u njoh nga afër modelin e votimit të diasporës së Greqisë në kuadër të përpjekjeve për të përcaktuar saktësisht mënyrën më të mirë të votimit të shqiptarëve që banojnë jashtë Shqipërisë.
Ministri Voridis paraqiti një tablo të plotë të avantazheve dhe problematikave të modelit të votimit të diasporës greke, i cili është miratuar në vitin 2019.
Folën gjithashtu edhe për mbështetjen që ka dhënë dhe jep Ministri i Brendshëm i Greqisë për komunitetin shqiptar që jeton atje dhe mbi kontributin për koordinimin potencial të votës së shqiptarëve me banim në Greqi nëse zgjedhin të votojnë aty ku jetojnë, çka planifikohet të ndodhë në zgjedhjet e 2025 për kuvendin e ri të Shqipërisë. Voridis u shpreh se ka qenë dy herë vëzhgues i zgjedhjeve shqiptare si pjesë e misioneve të OSBE/ODIHR dhe përgëzoi autoritetet shqiptare të administrimit zgjedhor për progresin e madh që ka vërejtur në zgjedhjet parlamentare të 25 Prillit 2021. Celibashi garantoi Ministrin e Brendshëm të Greqisë se do të mbahet hapur ura e komunikimit dhe bashkëpunimit zgjedhor dhe e ftoi në Tiranë për të vijuar shkëmbimin e eksperiencave profesionale.
Gjatë vizitës studimore në Athinë, Celibashi zhvilloi gjithashtu një takim në Ministrinë e Jashtme të Greqisë, ku bashkëbisedoi me Sekretarin e Përgjithshëm për Diasporën Greke dhe Diplomacinë Publike, Ioannis Chrysoulakis, i cili paraqiti një tablo të gjerë të profilit zgjedhor të diasporës së tyre, pritshmëritë dhe aspektet teknike të përfshirjes së tyre për votimin në distancë. Krahasuan legjislacionet respektive dhe gjithashtu analizuan profilet e gjeneratave të ndryshme të zgjedhësve jashtë vendit, si edhe zgjidhjet dhe praktikat ndërkombëtare.
Një takim të dedikuar tek çështjet e administrimit dhe logjistikës zgjedhore pati edhe me Drejtorin e Përgjithshëm të Ministrisë së Brendshme të Greqisë, Dr. Theodore Economou. Si një nga ekspertët më të njohur zgjedhorë, Dr. Economou shpjegoi me hollësi hapat e administrimit të zgjedhjeve në vendin e tij, zgjidhjet dhe aspektet logjistike të procesit zgjedhor atje, si edhe shkëmbyem përvojat tona zgjedhore. Folën gjithashtu edhe për logjistikën e votimit në distancë dhe zgjidhjet më të mira për të lehtësuar sa më shumë eksperiencën e votimit nga brenda dhe jashtë vendit.
Në përfundim të vizitës dy-ditore në Athinë, Komisioneri Celibashi falenderoi përzemërsisht Ambasadoren e Republikës së Greqisë në Tiranë, zonjën Sophia Philippidou dhe stafin e saj, për organizimin e shkëlqyer të takimeve dhe personaliteteve të nivelit të lartë pjesëmarrëse në to, si edhe për kontributin e saj domethënës për KQZ. Me respekt dhe kënaqësi maksimale falenderoi Ambasadoren e Shqipërisë në Athinë, zonjën Luela Hajdaraga, e cila mbështeti me profesionalizëm të lartë dhe dashamirësi çdo moment të shkëmbimeve tona institucionale me autoritetet zgjedhore greke.
