Komisioneri Shtetëror i Zgjedhjeve në seancën e sotme publike caktoi partitë politike që do të propozojnë anëtarët e Komisioneve të Zonave të Administrimit Zgjedhor (KZAZ), që do të ngrihen dhe funksionojnë për zgjedhjet e pjesshme vendore të datës 6 Mars 2022, si më poshtë:
- Tre anëtarë propozohen nga Partia Socialiste e Shqipërisë;
- Dy anëtarë propozohen nga Partia Demokratike e Shqipërisë;
- Një anëtar propozohet nga Lëvizja Socialiste për Integrim;
Anëtari i shtatë i KZAZ-ve do të propozohet në përputhje me rezultatet e shortit të hedhur në KQZ, ndërmjet Partisë Socialiste të Shqipërisë dhe Partisë Demokratike të Shqipërisë. Ndërsa, sekretari i KZAZ-së do të propozohet:
- Nga partia Socialiste e Shqipërisë në KZAZ-të ku Partia Socialiste ka propozuar zëvendëskryetarin e KZAZ-së;
- Nga Partia Demokratike në KZAZ-të, ku Partia Demokratike ka propozuar zëvendëskryetarin e KZAZ-së;
Partitë politike duhet të paraqesin kandidaturat për anëtarë të KZAZ-ve jo më vonë se data 25 Janar 2022.
Sot gjithashtu, u hodh shorti për caktimin e partive që do të propozojnë anëtarin e shtatë të KZAZ-ve. Sipas rezultatit të shortit, Partia Socialiste e Shqipërisë do të propozojë anëtarin e shtatë të KZAZ-ve me numër tek dhe Partia Demokratike do të propozojë anëtarin e shtatë të KZAZ-ve me numër çift.
Komisioneri Shtetëror i Zgjedhjeve miratoi edhe formatin dhe specifikimet e vulës së KZAZ, vulës së KQV, vulës së kryetarit të KQV dhe vulës rezervë të KQV, për zgjedhjet e pjesshme vendore të datës 06.03.2022″.
