Komisioni Qendror i Zgjedhjeve në bashkëpunim me Prezencën e OSBE-së në Tiranë dhe Ambasadën Britanike celebruan “Ditën Botërore të Zgjedhjeve” dhe të pranishëm ishin të rinj dhe përfaqësues të Institutit për Kulturë i Romëve në Shqipëri (IRCA), Rrjetit Profesional të të Rinjve, Rrjeti Këshillues i të rinjve, Forumit të të Rinjve me probleme në Shikim, e të tjerë.
Mesazhet kryesore u përcollën nga Komisioneri Shtetëror i Zgjedhjeve, z. Ilirjan Celibashi, Zëvendës Shefja e Prezencës së OSBE-së, zj. Clarisse Pasztory dhe Zëvendës Ambasadori Britanik, z. Jason Ivory.
Komisioneri Celibashi theksoi rëndësinë e pjesëmarrjes në zgjedhje, si një proces i rëndësishëm i cili lidhet drejtëpërdrejt me përzgjedhjen e kandidatëve dhe alternativave që qeverisin vendin. KQZ është e angazhuar maksimalisht për t’i dhënë rëndësinë që meriton edukimi dhe sensibilizimi i qytetarëve mbi rëndësinë e votës së tyre.
Komisioneri Shtetëror i Zgjedhjeve nën simbolikën e kësaj dite lançoi edhe projektin e edukimit të zgjedhësve, mbështetur nga Ambasada Britanike në Tiranë. Projekti konsiston në një tur gjithëpërfshirës dëgjimi, konsultimi dhe bashkëpunimi me të rinjtë, gratë dhe pakicat kombëtare në të gjithë Shqipërinë.
Zëvendës Shefja e Prezencës së OSBE-së në Tiranë, zj. Clarisse Pasztory u shpreh se OSBE do të vijojë të mbështesë institucionet dhe proceset demoktratike në vendin tonë, duke sjellë në vëmendje mbështetjen e dhënë për reformën zgjedhore, ndërgjegjësimin e të rinjve, grave dhe pakicave kombëtare ë të tjerë.
Ajo tha se është shumë e rëndësishme që të rinjtë të informohen dhe ndërgjegjësohen mbi rëndësinë e votës së tyre dhe pjesëmarrjen në proceset vendimmarrëse të vendit.
Nga ana e tij, Zv/Ambasadori Britanik, z. Jason Ivory tha se Mbretëria e Bashkuar ka mbështetur procesin zgjedhor në Shqipëri duke ofruar asistencë teknike për organet zgjedhore, duke mbështetur monitorimin e zgjedhjeve dhe duke rritur pjesëmarrjen duke angazhuar shoqërinë civile dhe median. “Aktualisht, ne po mbështesim KQZ-në për të filluar një program të ri të punës në terren me të rinjtë, gratë dhe minoritetet për t’i inkurajuar ata të angazhohen më shumë në zgjedhje. Nëse ka një mesazh kyç që unë ju kërkoj ta kujtoni nga eventi i sotëm, ai është ky – “Çdo votë ka rëndësi, Vota juaj ka rëndësi.”
Prandaj shtoi ai, është thelbësore që çdo i ri të angazhohet në procesin zgjedhor pasi në fund të fundit ju keni mundësia e drejtpërdrejtë për të ndikuar se cila parti politike vjen në pushtet dhe cila përfundon në opozitë. Procesi zgjedhor është e vetmja mundësi që çdokush ka për të dëgjuar zërin e tij/saj.
Komisioni Qendror i Zgjedhjeve ka filluar implementimin e programeve edukuese dhe sensibilizuese në të gjithë vendin me qëllim ndërgjegjësimin e të rinjve, grave, grupeve të ndryshme të zgjedhësve mbi rëndësinë e votës së tyre dhe pjesëmarrjes në zgjedhje.
