Komisioneri Shtetëror i Zgjedhjeve në seancën e sotme publike miratoi modelet e dokumentacionit të punës që do të përdoren nga KZAZ 26, Bashkia Vorë, ku do të zbatohet procesi elektronik i votimit dhe numërimit (PEVN) në zgjedhjet e pjesshme për kryetar bashkie, të datës 6 Mars 2022.

Komisioneri akreditoi vëzhguesit e Ambasadës së Francës, Polonisë, Sllovenisë, Kroacisë, Spanjës dhe Gjermanisë si dhe përfaqësues të medias “Top Channel”, për vëzhgimin e zgjedhjeve të pjesshme për kryetar bashkie.

Gjithashtu, dha autorizimin për ndryshimin e vendodhjes së dy qendrave të votimit në bashkinë Shkodër dhe miratoi udhëzimin për përdorimin e aplikacionit “KQZ” në zgjedhjet e pjesshme për kryetar bashkie të datës 6 Mars 2022. Përmes aplikacionit “KQZ” anëtarët e KQV-ve ose të KZAZ-ve, si dhe sipas rastit operatorët, do të informojnë KQZ për ecurinë e procesit të votimit, pjesëmarrjen në votime, problematikat që mund të konstatohen, dorëzimin e bazës material zgjedhore, vendimmarrjen e tyre e të tjerë.

Komisioneri Celibashi vendosi t’i tërheqë vëmendjen Tv Koplikut, për marrjen e masave të menjëhershme për ndërprerjen e transmetimeve të reklamave politike jashtës fashës kohore të përcaktuar nga Kodi Zgjedhor.