Komisioni Qendror i Zgjedhjeve zhvilloi testimin operacional të pajisjeve të votimit dhe numërimit elektronik, projektit pilot i cili për zgjedhjet e datës 6 Mars do të zbatohet vetëm në Bashkinë Vorë.
Testimi u zhvillua në ambjentet e KQZ-së në Lundër, në zbatim të dispozitave të Kodit Zgjedhor për të evidentuar përputhshmërinë e kritereve nga KQZ në raport me atë çfarë ofrojnë pajisjet. Komisioneri Shtetëror i Zgjedhjeve, z. Ilirjan Celibashi garantoi zgjedhësit e Bashkisë Vorë se ditën e Dielë, ekziston e gjithë garancia dhe siguria e votës së tyre.
Pajisja Elektronike e Votimit dhe Numërimit, e cila do të përdoret vetëm në 44 qendrat e votimit në Bashkinë Vorë, lejon votimin në mënyrë të thjeshtë dhe të sigurt për qytetarët. Vota elektronike shoqërohet me votën e printuar, e cila verifikohet nga vetë zgjedhësi para se ajo të bjerë në kutinë e votimit.
Software i pajisjes ofron standarde të larta sigurie dhe ndërfaqja e votimit është e ngjashme me fletën e printuar të votimit. Në këtë mënyrë votuesi do ta ketë të lehtë ndërveprimin me pajisjen.
