Komisioneri Shtetëror i Zgjedhjeve, z. Ilirjan Celibashi dhe Nënkomisionerja, zj. Lealba Pelinku në komunikimin me median përcollën informacion të përditësuar mbi procesin e zgjedhjeve të pjesshme të datës 6 Mars 2022.
Informacioni i përcjellë nga Komisioneri Celibashi:
Ka përfunduar procesi i numërimit të votave dhe i nxjerrjes së rezultatit për të 6 bashkitë Shkodër, Dibër, Durrës, Vorë, Rrogozhinë dhe Lushnjë.
Janë miratuar tabelat përmbledhëse të rezultateve për të gjitha KZAZ në 6 bashkitë.
Sikurse përcakton Kodi Zgjedhor, me vendimin të KZAZ përkatëse është shpallur zyrtarisht kandidati fitues për bashkitë:
1. Vorë, fitues është Blerim Shera me 8431vota;
2. Rrogozhinë, fitues është Edison Memolla me 5438 vota;
3. Dibër, fitues është Rahim Spahiu me 13995 vota.
Për bashkitë Shkodër, Durrës dhe Lushnje rezultati zyrtar për fitues do të shpallet nga KQZ sapo të marrim Tabelat Përmbledhëse të Rezultateve nga KZAZ-të, që janë pjesë të secilës prej tre bashkive të cituara.
Rezultati paraprak për këto bashki është:
1. Shkodër, kandidati Majlinda Angoni ka marrë 18205 vota, kandidati Bardh Spahia ka marrë 20125 vota., kandidati Xhemal Bushati ka marrë 7749 vota;
2. Durrës, kandidati Ardian Muka ka marrë 19876 vota, kandidati Emiriana Sako ka marrë 39157 vota, kandidati Luan Hoti ka marrë 7937 vota;
3. Lushnje, kandidati Eriselda Sefa ka marrë 21477vota, kandidati Indrit Sefa ka marrë 3809 vota, kandidati Elton Bano ka marrë 11238 vota.
Votimi dhe numërimi elektronik në Vorë
Nuk kemi asnjë raportim për problematika në lidhje me sistemin e votimit elektronik. Edhe nga verifikimet në terren të bëra direkt nga KQZ procesi ka shkuar shumë mirë. Kjo bazuar në cfarë komisionerët kanë thënë por edhe votues të Vorës.
Identifikimi Elektronik, u zhvillua thuajse me asnjë problem.
75% të QV u hapën në ora 07.00.
25% të QV (shumica e tyre u hapën) deri në 7.30.
Në 3 qendra votimi të KZAZ nr.2, bashkia Shkodër nuk u zhvillua votimi. QV. Nr. 0132, QV. Nr. 0133 dhe në QV. Nr. 0092.
Informacioni i përcjellë nga zj. Pelinku:
Pajisja e Elektronike e Identifikimit të zgjedhësve u përdor në 933 qendra votimi nga 941 në total sepse një QV ishte e posaccme.
Vetëm në 8 QV nuk u realizua identifikimi elektronik i zgjedhësve, nga të cila:
1. 3 QV nuk e hapën procesin e votimit (2 QV në Shkodër);
2. 3 QV procesi kaloi manualisht;
3. 2 QV u tërhoq operatori i pajisjes në ditën e votimit.
Nga 933 qendra votimi ku është përdorur pajisja PEI kemi patur vetëm 18 zëvëndësime të pajisjes.
KQZ pavarësisht kohës së shkurtër në dispozicion, e impelmentoi me sukses këtë teknologji edhe në zgjedhjet e pjesshme për kryetar bashkie.
