Ministri Britanik, Michael Ellis vlerëson rolin e KQZ-së në përballimin e sfidave zgjedhore

07/04/2022 | Lajme

Komisioneri Shtetëror i Zgjedhjeve u takua me Ministrin Britanik të Shtetit, z. Michael Ellis,

ku bashkëbiseduan mbi garantimin e zgjedhjeve të lira dhe të ndershme, shtetin e së drejtës në Shqipëri dhe rëndësinë e votës në forcimin e demokracisë shqiptare.

Celibashi e falenderoi Ministrin Ellis për mbështetjen e shkëlqyer politike dhe financiare ndaj Komisionit Qendror të Zgjedhjeve nga ana e Ambasadorit Alastair King-Smith dhe Ambasadës Britanike në Shqipëri dhe folën mbi zgjerimin e projekteve me mbështetjen nga Qeveria Britanike. Ministri Ellis vlerësoi progresin e dukshëm dhe rolin e KQZ-së në përballimin e sfidave zgjedhore.

Gjithashtu, në mjediset e KQZ-së Ministri i Shtetit Michael Ellis zhvilloi një takim të zgjeruar me organizatat e shoqërisë civile zbatuese të projekteve të mbështetura nga Qeveria Britanike. Ai u shpreh se Britania e Madhe do të vijojë të mbështesë nisma mbi kontrollin e financave të partive politike, mospërdorimin e burimeve publike në fushata zgjedhore, shmangien e ndërhyrjeve nga aktorë të huaj shtetërorë, garantimin e integritetit të zgjedhjeve dhe një sistemi të drejtë gjyqësor. Komisioneri Celibashi dhe Ministri Ellis dakordësuan se shumë është bërë, por ka akoma për të bërë për të rritur pjesëmarrjen në zgjedhje, përfshirjen e grupeve të margjinalizuara të shoqërisë shqiptare dhe rritjen e numrit të të rinjve votues.

LajmeMinistri Britanik, Michael Ellis vlerëson rolin e KQZ-së në përballimin e sfidave zgjedhore