Komisioneri Shtetëror i Zgjedhjeve, z. Ilirjan Celibashi zhvilloi një takim me Ambasadoren e SHBA-së në Tiranë, zonjën Yuri Kim, së bashku me përfaqësuesit e Partisë Socialiste të Shqipërisë, z. Damian Gjiknuri, Partisë Demokratike, zj. Jorida Tabaku, Partisë së Lirisë, zj. Monika Kryemadhi dhe z. Arian Madhi, përfaqësues i Partisë Republikane.

Ambasadorja Kim përcolli shqetësimin e SHBA-ve në lidhje me financimet e huaja ndaj politikës shqiptare dhe në mënyrë specifike të financimeve ruse.

Nga informacionet e fundit që partnerët zotërojnë, Ambasadorja Kim e përcolli këtë shqetësim tek aktorët politikë shqiptarë me qëllim që të rrisin vëmendjen dhe të bëjnë çfarë është në fuqinë e tyre me qëllim që financimet e huaja të mos kenë ndikim në politikën shqiptare. Celibashi tha se ka nevojë për përmirësim të kuadrit ligjor, të jepet mundësia praktike për të hetuar mbi sasinë e parave që marrin partitë politike dhe nga i marrin këto fonde.