Komisioni Qendror i Zgjedhjeve në bashkëpunim me Bashkimin Evropian dhe Këshillin e Evropës – Veprimi kundër Krimit Ekonomik në Shqipëri organizuan trajnim dyditor mbi përdorimin dhe funksionimin e platformës online të KQZ-së për monitorimin e partive politike, financimin dhe keqpërdorimin e burimeve shtetërore.
Kjo platformë është zhvilluar me qëllim forcimin e kapaciteteve mbikëqyrëse të KQZ-së dhe rritjen e transparencës dhe llogaridhënies së partive politike.
Në datat 23-24 shkurt, 110 monitorues të emëruar të KQZ-së dhe 10 financierë të partive politike u trajnuan me qëllim rritjen e njohurive të tyre teknike mbi përdorimin dhe funksionimin e platformës online.
Gjatë këtyre ditëve, pjesëmarrësit patën mundësinë të njihen me platformën online, modulet dhe funksionet kryesore të saj, si dhe u pajisën me informacion teknik për të siguruar funksionimin efektiv të platformës.
Trajnimet shërbyen për të rritur njohuritë e pjesëmarrësve mbi detyrimet e tyre ligjore dhe teknikat e monitorimit në lidhje me financimin e partive politike dhe keqpërdorimin e burimeve shtetërore gjatë fushatës elektorale për zgjedhjet për organet e qeverisjes vendore të datës 14 maj 2023.
Dy ekspertë të Këshillit të Evropës u angazhuan për t’i përshtatur trajnimet në bazë të nevojave specifike të përdoruesve kryesorë të platformës.
Ngritja e kapaciteteve të KQZ-së dhe aktorëve të përfshirë në procesin zgjedhor mbështetet nga programi i përbashkët i Bashkimit Europian dhe Këshillit të Europës, “Facilit Horizontal për Ballkanin Perëndimor dhe Turqinë”, i cili ka si synim për të ndihmuar përfituesit për të respektuar standardet e Këshillit të Evropës dhe të Bashkimit Evropian në kuadër të procesit të integrimit.
