Zgjedhjet vendore – Nis trajnimi i Policisë së Shtetit mbi detyrat dhe rolin e saj gjatë procesit zgjedhor

06/03/2023 | Lajme

Nisi sot procesi i trajnimeve për punonjësit e Policisë mbi detyrat dhe rolin që Policia e Shtetit ka gjatë procesit zgjedhor për zgjedhjet vendore të datës 14 Maj 2023.

Komisioneri Shtetëror i Zgjedhjeve, z. Ilirjan Celibashi së bashku me Kreun e Prezencës së OSBE-së në Tiranë, Ambasadorin Guido De Sanctis, Prokurorin e Përgjithshëm, z. Olsian Çela dhe Drejtorin e Përgjithshëm të Policia e Shtetit, z. Muhamet Rrumbullaku adresuan trajnimin e parë të Drejtuesve të Lartë të Policisë në nivel qendror dhe vendor në mjediset e Akademisë së Sigurisë.

Në këtë takim, Komisioneri Celibashi theksoi se Policia e Shtetit ka krijuar një traditë solide dhe është faktor garancie për procesin zgjedhor të datës 14 Maj 2023, si edhe shprehu bindjen se ajo do të prezantojë një nivel edhe më të lartë profesionalizmi.

Celibashi tha se KQZ dhe Policia e Shtetit ndajnë një traditë të gjatë bashkëpunimi dhe se jemi të gatshëm për t’u përgjigjur dhe sqaruar mbi çdo aspekt të organizimit zgjedhor.

Komisioneri Shtetëror i Zgjedhjeve, falenderoi për mbështetjen e pakursyer nga Prezenca e OSBE-së, si edhe për bashkëpunimin shumë profesional me Prokurorin e Përgjithshëm, z. Olsian Çela.

LajmeZgjedhjet vendore – Nis trajnimi i Policisë së Shtetit mbi detyrat dhe rolin e saj gjatë procesit zgjedhor