Komisioneri Shtetëror i Zgjedhjeve z. Ilirjan Celibashi mori pjesë në Forumin Vjetor me Rininë e Partive Politike i organizuar nga Fondacioni Westminster Foundation për Demokraci dhe mbështetur nga Ambasada Britanike në Tiranë.
Forumi Vjetor Rinor i Partive Politike mblodhi bashkë për herë të parë mbi 100 të rinj nga partitë kryesore politike në Shqipëri për të diskutuar mbi rëndësinë e të pasurit integritet në politikë dhe veçanërisht përpara zgjedhjeve vendore të 14 majit.
Komisioneri Celibashi foli mbi rolin që mund të luajnë të rinjtë për të siguruar integritetin e zgjedhjeve vendore të 14 majit, këndvështrimet e të rinjve të angazhuar në parti politike, deputetë të rinj, diplomatë dhe përfaqësues të njohur të shoqërisë civile dhe mediave.
“Integriteti i zgjedhjeve është thelbësor për të siguruar një demokraci të fortë dhe për të garantuar se vendimet politike janë në interes të të gjithë qytetarëve. Një element kryesor i integritetit të zgjedhjeve është pjesëmarrja e të rinjve në politikë” – tha Celibashi.
Zëvendës Ambasadorja e Mbretërisë së Bashkuar znj. Mia Marzouk, Drejtori i WFD, z. Sokol Haxhiu, deputetë, drejtues të rinjsh, përfaqësues të njohur të shoqërisë civile dhe medias, si dhe profesionistë të shquar nga fusha të ndryshme, morën pjesë dhe ndanë mendimet e tyre lidhur me nevojën e madhe për të pasur integritet në politikë në Shqipëri, si dhe rolin që mund të ketë të rinjtë për të thirrur dhe nxitur të tjerët për më shumë integritet.
