Zgjedhjet vendore 2023 – Celibashi takon Ambasadoret e BE dhe SHBA

05/04/2023 | Lajme

Sot, Komisioneri Shtetëror i Zgjedhjeve z. Ilirjan Celibashi, zhvilloi një takim me Ambasadoren e Bashkimit Europian, znj. Christiane Hohmann dhe Ambasadoren e Shteteve të Bashkuara të Amerikës, znj. Yuri Kim

Në takim u bashkëbisedua mbi përgatitjet e zgjedhjeve për organet e qeverisjes vendore të datës 14 Maj 2023, shpërdorimin e burimeve shtetërore për fushatë, dukurinë e shitblerjes së votës, transparencën e financimeve në zgjedhje dhe pastërtine e figurës së kandidatëve që do të garojnë për t’u zgjedhur.

Në këtë takim, Ambasadoret Hohmann dhe Kim theksuan se zgjedhjet e 14 Majit nuk janë thjesht për të zgjedhur qeverisjen vendore, por një test i mirëfilltë për progresin e demokracisë shqiptare dhe se të gjithë sytë e partnerëve ndërkombëtarë janë fokusuar mbi këto zgjedhje.

Komisioneri Celibashi theksoi dyfishimin e institucioneve shtetërore raportuese në KQZ, ndalimin e mbi 20 aktiviteteve publike, trefishimin e numrit të sanksioneve tw vendosura dhe i garantoi Ambasadoret Kim dhe Hohmann se KQZ do të vijojë të mbetet e barazlarguar nga politika dhe do të veprojë vetëm në zbatim të ligjit.

Në fund të takimit, Komisioneri falenderoi Ambasadoren e Bashkimit Europian dhe Ambasadoren e Shteteve të Bashkuara të Amerikës për mbështetjen e fortë ndaj KQZ dhe kontributin e tyre për institucionin.

LajmeZgjedhjet vendore 2023 – Celibashi takon Ambasadoret e BE dhe SHBA