Sot, Komisioneri Shtetëror i Zgjedhjeve z. Ilirjan Celibashi mikpriti Drejtorin e Përgjithshëm të Zyrës së OSBE-së për Institucionet Demokratike dhe të Drejtat e Njeriut (ODIHR), z. Matteo Mecacci, drejtuesen e Departamentit të Zgjedhjeve të ODIHR, zj. Meaghan Fitzgerald dhe këshilltarin z. Jacopo Leone. Në fokus të takimit ishte bashkëbisedimi mbi shumëfishimin e përpjekjeve për jetësimin e rekomandimeve të paplotësuara nga OSBE/ODIHR.

Përveç rekomandimeve që kërkojnë ndryshime ligjore, Komisioneri Celibashi i informoi përfaqësuesit e ODIHR se në administratën e KQZ është ngritur një task-forcë për realizimin e çdo rekomandimi të OSBE/ODIHR që ka të bëjë me kompetencën e KQZ.

Me Drejtorin e Përgjithshëm Mecacci u diskutua edhe mbi zgjerimin e votimit elektronik, votën e diasporës, depolitizimin e komisioneve zgjedhore, shpërdorimin e burimeve shtetërore në zgjedhje, financimin e partive politike dhe ndihmesën me ekspertizë nga ODIHR.