Në KQZ mikpritëm delegacionin nga Mbretëria e Bashkuar, i përbërë nga z. Ben Merrick, Drejtor i Njësisë së Fondeve të Përbashkëta (JFU), z. Robyn Goldsmith, Drejtues i Njësisë së Programit për Ballkanin Perëndimor (WPBU), zj. Lael Nyanteh, Këshilltare për Çështjet e Migracionit (JFU), z. Stephen Mallett, Shef i Financave (JFU), zj. Alec Harbutt, Departamenti i Thesarit dhe zj. Freya Sorrell, Këshilltare e Lartë e Politikave – Strategjia e Sigurisë Kombëtare dhe Shpenzimet, Thesari.

Qëllimi i takimit ishte vlerësimi i mbështetjes së dhënë nga Qeveria Britanike për Komisionin Qendror të Zgjedhjeve në lidhje me programet e edukimit zgjedhor dhe mbikqyrjen e financimit të partive politike gjatë fushatës zgjedhore.

Kryetarja e Komisionit Rregullator, zj. Ilirjana Nano, shprehu mirënjohjen për mbështetjen e vazhdueshme të qeverisë britanike. Ajo theksoi rëndësinë që ka patur kjo mbështetje për edukimin e zgjedhësve dhe rritjen e transparencës së financave të partive politike.

Gjithashtu, në takim u diskutua dhe vijimi i mbështetjes së Mbretërisë së Bashkuar për zgjedhjet e ardhshme për Kuvendin e Shqipërisë që do të mbahen në vitin 2025.