Komisioneri Shtetëror i Zgjedhjeve, z. Ilirjan Celibashi zhvilloi bashkëbisedim më gazetarët lidhur me përgatitjet e procesit të zgjedhjeve të datës 6 Mars 2022. Komisioneri Celibashi përcolli mesazhe dhe informacione të përditësuara mbi përgatitjet për zgjedhjet e pjesshme për kryetar bashkie.
Vlefshmëria e dokumenteve të identifikimit
Qeveria ka miratuar aktin normativ, i cili shtyn afatin e vlefshmërisë së dokumenteve të identifikimit për zgjedhësit në 6 bashkitë Shkodër, Vorë, Durrës, Dibër, Rrogozhinë, Lushnjë, ku do të zhvillohen zgjedhjet e pjesshme. Qyetarëve të cilëve u ka skaduar ose u skadon dokumenti i identifikimit në datën 6 mars 2022, nuk do të pengohen për të votuar. KQZ adresoi shqetësimet e ngrituara nga disa subjekte zgjedhore por edhe nga disa organizata të shoqërisë civile, me një kërkesë drejtuar Qeverisë për të vlerësuar mundësinë e shtyrjes së vlefshmërisë së dokumenteve të identifikimit, kërkesë e cila u mor në konsideratë.
Shpërndarja e bazës materiale zgjedhore
Jemi në fazën përmbyllëse të përgatitjeve të këtyre zgjedhjeve, kemi shpërndarë bazën materiale thuajse në të gjitha KZAZ-të, me përjashtim të KZAZ-së nr. 2 në Shkodër, për të cilën shpërndarja e bazës materiale do të bëhet sot. KZAZ-të janë në fazën e përfundimit të emërimit të anëtarëve të KQZ-ve. Partitë tashmë e kanë bërë të drejtë të tyre të pakontestueshme që të sjellin propozimet e para për anëtarë të KQV-së dy ose tre ditë para datës së zgjedhjeve për ndryshimin e komisionerëve. Besoj se brenda 24 orëve do të jenë të gjithë komisionerët sepse prania e tyre lidhet drejtëpërdrejtë me shpërndarjen e bazës materiale nga KZAZ-të në KQV.
KQZ do të marrë të gjithë masat që të mos kemi probleme me administrimin e procesit zgjedhor, problemet të cilat lidhen me vullnetin e komisionerëve apo subjekteve pjesëmarrëse në garë.
Krimet zgjedhore
KQZ do të ketë vëmendje të shtuar ndaj disa fenomeneve negative, të klasifikuara dhe si kriminale në zgjedhjet e shkuara. Çdokush që do të tentojë të angazhohet në një proces të shit-blerjes së votës apo edhe të ndikimit në një mënyrë tjetër mbi vullnetin e qyetarëve, do të ketë pasoja. Nëse KQZ konstaton persona të cilët përfshihen në veprime të cilat cënojnë integritetin zgjedhor do të përballen me pasojat ligjore. Në këtë kuadër ftoj të gjithë qyetetarët, shoqërinë civile, median apo përfaqësues të subjekteve politike që në rastet që do të evidentojnë shkelje të tilla t’i denoncojnë menjëherë ato në organet kompetente.
Teknologjia në zgjedhje
Sikurse e kemi bërë me dije edhe në këto zgjedhje do të bëhet identifikimi elektronik i votuesve në çdo qendër votimi dhe në bashkinë e Vorës do të bëhet votimi elektronik. Dua të rikonfirmoj që është një proces, i cili garanton në mënyrë të plotë, 100% sigurinë e votës.
Ndaj, ftoj të gjithë qytetarët e Vorës që të marrin pjesë në votime.
Kjo thirrje vlen edhe për zgjedhësit e 5 bashkive të tjera, MERRNI PJESË NË VOTIME!
KQZ ka përgatitur procesin zgjedhor në përputhje me të gjithë parashikimet e Kodit Zgjedhor.
