Sot, Komisioneri Shtetëror i Zgjedhjeve në seancë publike miratoi përmbajtjen e fletës së votimit për kandidatët për kryetar bashkie dhe fletës së votimit për kandidatët për anëtarë të këshillit bashkiak, Bashkia Tiranë për zgjedhjet për organet e qeverisjes vendore të datës 14 maj 2023.
Gjithashtu, miratoi përmbajtjen e fletës së votimit për kandidatët për kryetar bashkie dhe fletës së votimit për kandidatët për anëtarë të këshillit bashkiak për 60 bashkitë e tjera.
Fletët e votimit për kryetar bashkie në 61 bashki
Fletët e votimit për këshill bashkiak në 61 bashki
U miratua akreditimi i gazetarëve dhe stafit teknik të televizioneve “Report TV” dhe “News 24” për vëzhgimin e zgjedhjeve të datës 14 maj 2023.
Në këtë seancë u bë vlerësimi i raportimeve të veprimtarive me karakter publik të disa institucioneve, për periudhën 31 mars – 6 prill 2023. Komisioneri Shtetëror i Zgjedhjeve, përfundoi shqyrtimin administrativ dhe vendosi moskonstatim të shkeljes administrative dhe pushimin e procedimit administrativ ndaj institucioneve:
- Ministria e Turizmit dhe Mjedisit;
- Ministri i Shtetit për Marrëdhëniet me Parlamentin;
- Ministër Shteti për Mbrojtjen e Sipërmarrjes;
- Banka e Shqipërisë;
- Agjencia Kombëtare e Mbrojtjes Civile;
- Prefekti i Qarkut Berat;
- Bashkia Kamëz.
Komisioneri shqyrtoi të dhënat e deklaruara në formularin e vetëdeklarimit të subjektit vetëdeklarues z. Qerim Ismail Ismailaj, kandidat për Kryetar Bashkie i propozuar nga subjekti zgjedhor “Partia Socialiste”, për Bashkinë Mallakastër. Në vlerësim të përmbajtjes së deklarimeve të bëra, Komisioneri Shtetëror i Zgjedhjeve vendosi se z. Ismailaj nuk ndodhet në kushtet e ndalimit për të kandiduar, si edhe vendosi të dërgojë rastin për verifikim të thelluar në Prokurorinë e Përgjithshme.
