Komisioneri Shtetëror i Zgjedhjeve, z. Ilirjan Celibashi mori pjesë në tryezën “Parandalimi i ndikimit të paligjshëm në zgjedhje nga këndvështrimi i financimit të fushatës dhe partive politike” e organizuar nga NDI Albania – Instituti Demokratik Amerikan.

Në tryezë, me përfaqësues të partive politike, ekspertë ndërkombëtarë dhe vendas, përfaqësues të OSBE/ODIHR dhe shoqërisë civile, diskutuan rreth financimit të partive politike nga palë të treta dhe mundësitë e kontrollit të financave të këtyre të fundit, sidomos në fushatat zgjedhore.

Komisioneri Celibashi theksoi se “Reforma e re e pritshme zgjedhore duhet të adresojë disa nga aspektet e financimit të fushatave të partive politike dhe të subjekteve të tjera zgjedhore. Kështu duket se ka nevojë për rregulla më të qarta mbi regjistrimin, deklarimin dhe publikimin e fondeve jopublike që përfitojnë subjektet zgjedhore, sidomos nga palë të treta. Ky opinion vlen edhe për shpenzimet elektorale në rrjetet sociale dhe median online”.

Në ditën e dytë të forumit “Parandalimi i ndikimit të paligjshëm në zgjedhje nga këndvështrimi i financimit të fushatës dhe partive politike” organizuar nga NDI Albania dhe me asistencën e OSBE/ODIHR u diskutua rreth zbatueshmërisë së rregullimeve për palët e treta, si dhe ndryshimet që kërkohen në legjislacion për të mundësuar zbatim më të mirë të mbikqyrjes financiare në zgjedhje.

U dhanë mendime dhe opinione nga ekspertë të KQZ së Britanisë së Madhe rreth transparencës së financimeve të fushatave dhe partive politike, si edhe financimeve nga palët e treta.