Me kërkesë të Kolegjit Zgjedhor, KQZ depozitoi projektvendimin për afatet e rishikuara proceduariale për zgjedhjet e pjesshme për Kryetarin e Bashkisë Himarë, të datës 4 gusht 2024.

Kolegji Zgjedhor, afatet e propozuara i gjeti të bazuara në Kodin Zgjedhor dhe në reflektim të situatës kohore në momentin e hartimit të tyre, në raport me datën e zgjedhjeve, të reduktuara dhe që respektojnë kronologjinë e veprimeve të cilat parashikohen në Kodin Zgjedhor, te nevojshme për të garantuar zgjedhjet.

Kolegji Zgjedhor Gjyqësor, bazuar në nenin 158/1/b, të Kodit Zgjedhor të Republikës së Shqipërisë, me shumicë votash miratoi afatet procedurale si më poshtë vijon:

1. Nga data 26.7.2024 deri më datë 4.8.2024, Bashkia Himarë dhe institucionet e saj të varësisë, janë të detyruara të raportojnë në KQZ, të gjitha veprimtaritë me karakter publik që planifikojnë të zhvillojnë. Të njëjtin detyrim kanë edhe institucionet publike qendrore, organet e tyre të varësisë dhe degët e tyre vendore, si dhe agjencitë dhe/ose ndërmarrjet shtetërore, për veprimtari me karakter publik, që planifikojnë të zhvillojnë në këtë periudhë në territorin e Bashkisë Himarë, ose për të.  
2. Nga data 26.7.2024, nga ora 08:00-00:00, ose sipas rastit, deri në përfundimin e programi, Autoriteti i Mediave Audiovizive monitoron OSHMA-të për veprimtaritë me karakter publik të institucioneve publike;
3. Jo më vonë se data 19.7.2024, Kryetari i Bashkisë në detyrë paraqet në KQZ, listën e plotë të objekteve të qendrave të votimit që përmbushin kushtet e parashikuara në ligj; 
4. Jo më vonë se data 25.7.2024, Kryetari i Bashkisë në detyrë të përcaktojë vendet publike, në territorin e Bashkisë Himarë, për afishimin nga subjektet zgjedhore të materialeve propagandistike; 
5. Jo më vonë se data 19.7.2024, partitë politike, të cilat kanë të drejtë të paraqesin anëtarë në KQV, duhet t’i depozitojnë ato në KZAZ-në nr. 88, KZAZ-ja merr vendim për emërimin e anëtarëve të KQV-ve, jo më vonë se data 20.7.2024;  
6. Jo më vonë së data 24.7.2024, partitë politike, të cilat kanë të drejtë të paraqesin anëtarë në GNV, duhet t’i depozitojnë ato në KZAZ. KZAZ-ja merr vendim për emërimin e anëtarëve të GNV-ve, jo më vonë se 25.7.2024. 
7. Jo më vonë se ora 16.00 e datës 22.7.2024, partitë politike duhet të paraqesin kërkesën në KQZ, për regjistrim si subjekte zgjedhore, për zgjedhjet e pjesshme për kryetar në Bashkinë Himarë. KQZ-ja kthen për plotësim dokumentacionin brenda 8 (tetë) orëve nga dorëzimi. Partitë politike paraqesin dokumentacionin e korrigjuar brenda orës 12.00 të datës 23.7.2024. Komisioneri Shtetëror i Zgjedhjeve miraton kërkesat për regjistrim brenda 3 (tre) orëve nga ridërgimi i dokumentacionit të korrigjuar. 
8. Jo më vonë se ora 16.00 e datës 22.7.2024, Komitetet Nismëtare duhet të paraqesin kërkesën për regjistrim për zgjedhjet e pjesshme për Kryetar në Bashkinë Himarë, në KZAZ,. KZAZ-ja kthen për plotësim dokumentacionin brenda 8 (tetë) orëve nga dorëzimi. Komitetet Nismëtare paraqesin dokumentacionin e korrigjuar brenda orës 12.00 të datës 23.7.2024. KZAZ-ja miraton kërkesat për regjistrim brenda 3 (tre) orëve nga ridërgimi i dokumentacionit të korrigjuar. 
9. Jo më vonë se ora 12:00 e datës 24.7.2024, koalicionet zgjedhore duhet të paraqesin në KQZ kërkesën për regjistrimin si koalicion për zgjedhjet e pjesshme për kryetar në Bashkinë Himarë. KQZ-ja kthen për plotësim dokumentacionin brenda 2 (dy) orëve nga dorëzimi. Partitë politike paraqesin dokumentacionin e korrigjuar brenda orës 18.00 të datës 24.7.2024. Komisioneri Shtetëror i Zgjedhjeve miraton kërkesat për regjistrim brenda 3 (tre) orëve nga ridërgimi i dokumentacionit. 
10. Jo më vonë se ora 16.00 e datës 25.7.2024, paraqiten në KZAZ dokumentet e kandidimit. KZAZ-ja bën verifikimin e tyre, jo më vonë se 4 (katër) orë nga paraqitja, dhe në rast se vëren parregullsi, i kthen për plotësim. Dokumentet e plotësuara duhet të riparaqiten jo më vonë se ora 12.00 e datës 26.7.2024. KZAZ-ja merr vendim jo më vonë se 4 (katër) orë nga riparaqitja e tyre. 
11. Në datë 27.7.2024 fillon fushata zgjedhore;
12. Jo më vonë se data 1.8.2024 paraqiten kërkesat për akreditimin e vëzhguesve shqiptarë dhe për vëzhguesit e huaj; 
13. jo më vonë se data 1.8.2024, paraqiten kërkesat për akreditim nga ana e subjekteve zgjedhore pjesëmarrëse në KZAZ.