Komisioneri Shtetëror i Zgjedhjeve, z. Ilirjan Celibashi mikpriti në KQZ Ambasadorin e Mbretërisë së Bashkuar, z. Alastair King-Smith, me të cilin zhvilloi bashkëbisedimin e fundit para përfundimit të misionit të tij në Shqipëri.

Në takim u diskutua me detaje mbi përpjekjet e Qeverisë Britanike për fuqizimin e demokracisë dhe institucioneve të pavarura në Shqipëri dhe rajon, si dhe ndanë pikëpamjet mbi zhvillimet e fundit të ndryshimeve legjislative në Kodin Zgjedhor që mundësojnë votimin e shqiptarëve jashtë vendit dhe adresimin e vendimeve të Gjykatës Kushtetuese.

Ambasadori King-Smith siguroi për vazhdimin e mbështetjes shumë-planëshe ndaj KQZ dhe forcimin e rolit koordinues të institucionit në kuadër të hetimit të krimeve zgjedhore dhe intensifikimit të mbikqyrjes së financimit të subjekteve dhe fushatave zgjedhore.

Komisioneri Celibashi i shprehu Ambasadorit King-Smith mirënjohjen për rolin si mik i vërtetë dhe kampion i mbështetjes së KQZ-së dhe zhvillimeve demokratike në Shqipëri.