Komisioneri Shtetëror i Zgjedhjeve në seancën e sotme publike shqyrtoi rezultatet e verifikimit të thelluar të Prokurorit të Përgjithshëm për dy kandidatë për anëtarë në Këshill Bashkiak në zgjedhjet e datës 14 Maj 2023 dhe një Kryetar Bashkie në detyrë, në zbatim të ligjit nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”, si dhe vendimit nr. 17/2016 të Kuvendit.
Në përfundim të shqyrtimit, Komisioneri konstatoi se subjekti vetëdeklarues z. Syrja Hyzedin Çobo, kandidat për anëtar në Këshillin e Bashkisë Berat, i propozuar nga subjekti zgjedhor “Partia Demokratike” dhe subjekti vetëdeklarues z. Miftar Tahir Dauti, Kryetar Bashkie në Bashkinë Has, i propozuar nga subjekti zgjedhor Koalicioni “Bashkë Fitojmë”, nuk janë në kushtet e ndalimit të kandidimit/moszgjedhshmërisë.
Për subjektin vetëdeklarues z. Kreshnik Faslli Myrtollari, kandidat për anëtar në Këshillin e Bashkisë Tiranë, i propozuar nga subjekti zgjedhor “Partia Agrare Ambjentaliste e Shqipërisë”, Komisioneri deklaroi të përfunduar dhe pa vendim përfundimtar procedurën administrative pasi vlerësohet së ka humbur objekti dhe qëllimi i procedurës së filluar përpara datës së zgjedhjeve.
