Sot, Komisioneri Shtetëror i Zgjedhjeve vendosi dhënien e mandatit të deputetit të Kuvendit të Shqipërisë, kandidatit të listës shumemërore të Partisë Demokratike të Shqipërisë, Qarku Korçë, z. Andrea Mano. 

Në seancën e sotme publike u shqyrtua rezultati i verifikimit të Prokurorit të Përgjithshëm për subjektin vetëdeklarues z. Euland Haki Daja, kandidat për anëtar në Këshillin e Bashkisë Shijak, i propozuar nga subjekti zgjedhor “Partia Demokratike”, për zgjedhjet për organet e qeverisjes vendore të datës 14 maj 2023.  

Komisioneri vendosi ndalimin për të ushtruar funksionin publik të z. Euland Daja, kandidat për anëtar në Këshillin e Bashkisë Shijak, i renditur në listë me numrin rendor 10 (dhjetë) dhe që potencialisht mund të përfitojë mandatin e anëtarit të këshillit për këtë legjislaturë. 

Gjithashtu, u shqyrtua edhe rezultati i verifikimit të Prokurorit të Përgjithshëm për subjektin vetëdeklarues z. Leonard Vyrtyt Hide, kryetar bashkie në Bashkinë Libohovë, i propozuar nga subjekti zgjedhor “Partia Socialiste e Shqipërisë”, për zgjedhjet për organet e qeverisjes vendore të datës 14 maj 2023. 

 Komisioneri konstatoi se z. Leonard Hide nuk përfshihet në kushtet e ndalimit për të ushtruar funksionin publik të Kryetarit të Bashkisë.