Elvin Lako u zgjodh në datë 05.10.2020, anëtar i Komisionit të Ankimimeve dhe Sanksioneve në Komisionin Qendror të Zgjedhjeve. Ai ka një përvojë të gjatë drejtuese në administratën publike.

Në vitin 2013 u emërua Drejtor i Përgjithshëm në Drejtorinë e Përgjithshme të Pronësisë Industriale, ku shërbeu për mbi 5 vjet.

Nga viti 2005 deri në vitin 2013 ka mbajtur pozicionin e inspektorit pranë Departamentit të Kontrollit të Brendshëm Administrativ dhe Antikorrupsionit në Këshillin e Ministrave.

Në vitet 2001 dhe 2002, z. Lako ka shërbyer si jurist në Këshillin e Ministrave, Ministrinë e Kulturës Rinisë dhe Sporteve, dhe ka ofruar shërbimet e tij si këshilltar pranë Ministrit të Mbrojtjes.

Menjëherë pas diplomimit të tij në vitin 1999 nga Fakulteti i Drejtësisë, Universiteti i Tiranës, z. Lako u emërua asistent jurist në administratën e Këshillit të Ministrave.

Përgjatë përvojës së tij profesionale, z. Lako ka patur angazhime të ndryshme të shumta në fushën e Pronësisë Industriale si konsulent,  anëtar bordi administrativ.

Elvis Çefa vjen në Komisionin e Ankimimeve dhe Sanksioneve në Komisionin Qendror të Zgjedhjeve pas një angazhimi të gjatë në ushtrimin e ligjit dhe administratën publike.

Ai u diplomua Jurist në vitin 1996 në Fakultetin e Drejtësisë të Universitetit të Tiranës. Gjithashtu në të njëjtin fakultet, në vitin 2011 përfundoi studimet “Master i Nivelit të Dytë” me drejtim publik, në të drejtën europiane dhe kushtetuese të krahasuar.

Pas diplomimit në vitin 1996, ai nisi rrugëtimin profesional në administratën publike ku fillimisht shërbeu si inspektor dhe drejtor i Drejtorisë Rajonale Tiranë pranë Kontrollit të Lartë të Shtetit. Nga viti 2000, z. Çefa ka shërbyer për 4 vjet si inspektor në Drejtorinë e Kontrollit Financiar pranë Prefektit Tiranë, dhe më pas ka ofruar shërbimet e tij juridike në pozicione të ndryshme në Ministrinë e Shëndetësisë, në Kontrollin e lartë të Shtetit dhe Këshillin e Ministrave.

Nga viti 2009 ai ka drejtuar Agjencinë e Kthimit dhe Kompensimit të Pronave. Në prill 2012, z. Çefa u votua nga Kuvendi i Shqipërisë si anëtar i Këshillit të Lartë të Drejtësisë ku ka mbajtur njëkohësisht edhe detyrën e zëvendëskryetarit.

Nga viti 2016 ai ka filluar aktivitetin privat në ushtrimin e ligjit si konsulent dhe përfaqësues ligjor, të cilin e ka ndërprerë përkohësisht gjatë vitit 2017 për të mbajtur detyrën e këshilltarit në Kabinetin e Zëvendëskryeministrit.

Elvis Çefa ka lindur më 28 shtator 1973 në Tiranë. Ai është i martuar dhe ka dy fëmijë.

I zgjedhur anëtar i Komisionit të Ankimimeve dhe Sanksioneve me vendimin nr. 59/2020 të Kuvendit të Shqipërisë, Ilirjan Rusmali vjen në KAS pas një përvoje të gjatë profesionale dhe politike, e cila ka filluar në vitin 1987 me diplomimin e tij si jurist nga Fakulteti i Drejtësisë i Univeristetit të Tiranës.

Pasi shërbeu si lektor i të drejtës kushtetuese në të njëjtin fakultet, Ilirjan Rusmali është aktivizuar në periudhën 1995-1997 në administratën e lartë shtetërore, (Kryeministri, Presidencë dhe Kuvend) si këshilltar juridik, përpara se të ushtrohej në sektorin privat dhe si veprimtar i shoqërisë civile në periudhën 1998-2001.

Ai i është rikthyer aktivizimit në sektorin privat pas vitit 2013 dhe aktualisht punon si ekspert i pavarur kushtetues. Në këtë kuadër, ai ka marrë pjesë si ekspert draftues pranë komisioneve parlamentare të reformës zgjedhore dhe ka kontribuar në hartimin e kuadrit aktual ligjor të zgjedhjeve.

Ilirjan Rusmali ka akumuluar një përvojë të konsiderueshme politike përgjatë viteve 2001-2013 si funksionar i lartë i Partisë Demokratike, Ai ka qenë i zgjedhur për dy mandate anëtar i Këshillit Bashkiak Tiranë (2000, 2003) dhe për dy mandate të tjera deputet i Kuvendit të Republikës së Shqipërisë (2005, 2009).

Përgjatë veprimtarisë parlamentare Ilirjan Rusmali ka mbajtur detyrën e Kryetarit të Komisionit të Çështjeve Ligjore, të Drejtave të Njeriut dhe Administratës Publike, ka qenë anëtar i Këshillit të Legjislacionit dhe i Komisionit të Mandateve dhe Imuniteteve, si dhe ka bashkëdrejtuar Komisionin ad hoc të reformës zgjedhore të kohës. Gjithashtu, ai ka qenë kryetar i delegacionit parlamentar të Shqipërisë në Asamblenë Parlamentare të Këshillit të Evropës.

Ilirjan Rusmali në vitet 2005-2008 ka qenë njëpasnjëshëm Zëvendëskryeministër dhe Ministër i Drejtësisë i Republikës së Shqipërisë.

Veprimtaria profesionale dhe politike e tij në nivele të larta është shoqëruar nga një aktivitet i dendur publik dhe mediatik. Ai gëzon reputacion të gjerë, sidomos sa i takon profesionalizmit, korrektesës ligjore dhe ndershmërisë.

Ilirjan Rusmali është njohës dhe praktikues i anglishtes, gjermanishtes dhe italishtes.

I zgjedhur anëtar i Komisionit Ankimimeve dhe Sanksioneve me vendimin nr. 59/2020, z. Koli Bele vjen në KAS pas një përvoje të gjatë profesionale, e cila ka filluar në vitin 1997 me diplomimin e tij si jurist nga Fakulteti i Drejtësisë i Universitetit të Tiranës.

Zoti Bele ka një karrierë të pasur profesionale në institucione të ndryshme të administratës publike si: Jurist në Kontrollin e Lartë të Shtetit (1998-2002 ), Këshilltar Ligjor i Prokurorit të Përgjithshëm (2002-2005), Prokuror pranë Prokurorisë së Rrethit Gjyqësor Tiranë (2005- 2009), Sekretar i Përgjithshëm i Ministrisë se Energjisë dhe Industrisë, dhe Ministrisë së Arsimit (2013/17 – 2019), si dhe Konsulent dhe  Avokat pranë Dhomës së Avokatisë Tiranë.

Zoti Bele ka kryer studimet pas-universitare:  LLM, Master në Drejtë Ndërkombëtare Penale në Universitetin e Sussex, Brighton, Mbretëria e Bashkuar, ( Programi Chevening Schoolarship) dhe  MPA, Master në Administrim Publik, Fakulteti Ekonomik i UT, diplomë e përbashkët me Nebraska Linkoln USA

Nga viti 2000 është angazhuar si pedagog i jashtëm pranë Fakultetit Juridik të UT si dhe fakultete të tjera në Shqipëri. Ai ka mbajtur  një angazhim konstant në jetën publike, shoqërinë civile, si dhe është përfshirë aktivisht në projekte, publikime, referime etj, të lidhura me fushës e së drejtës.

Ledio Braho që nga nëntori i vitit 2014, është avokat dhe Partner Themelues/Drejtues pranë Zyrës “B&K Legal & Tax Consulting” sh.p.k. me aktivitet kryesor në fushën e të drejtës civile dhe asaj administrative. Më parë ai ka punuar si Këshilltar Ligjor i Presidentit të Republikës së Shqipërisë, si pjesë e Programit Lead Albania.

Zoti Braho ka kryer studimet master (LL.M.) në fushën e të drejtave ndërkombëtare të njeriut dhe ligjit humanitar pranë Europa-Universität Viadrina në Gjermani, me bursë nga Shërbimi Akademik i Shkëmbimit Gjerman (DAAD). Më herët, ai ka kryer studimet në jurisprudencë duke u diplomuar si jurist pranë Fakultetit të Drejtësisë në Universitetin e Tiranës. Gjatë studimeve, ai ka qenë i zgjedhur si përfaqësues i studentëve në Këshillin Akademik të Fakultetit të Drejtësisë.

Me vendim të Komisionit të Posaçëm Parlamentar për Reformën në Sistemin e Drejtësisë ai është emëruar si Konsulent, pjesë e Rrjetit të Profesionistëve të Konsultimit Publik për Grupin e Reformës në Sistemin Gjyqësor ku ka dhënë disa opinione.

Zoti Braho ka punuar më parë pranë Inspektoratit Qendror, Ministrisë së Integrimit Evropian, si edhe lektor i të Drejtës Ndërkombëtare Private dhe asaj Publike pranë “Albanian University” në Tiranë.

Si Avokat, z. Braho është zgjedhur Anëtar i Këshillit të Përgjithshëm të Dhomës së Avokatisë të Shqipërisë dhe asaj të Tiranës për një mandat 4 vjeçar. Gjithashtu, ai është zgjedhur edhe anëtar i Komitetit të Disiplinës pranë Dhomës së Avokatisë së Shqipërisë.

Së fundmi, që nga tetori i vitit 2020, z. Braho është zgjedhur nga Kuvendi i Shqipërisë anëtar i Komisionit të Ankimimeve dhe Sanksioneve në Komisionit Qendror të Zgjedhjeve.