Komisioneri
Komisioneri Shtetëror i Zgjedhjeve (Komisioneri) është organ monokratik dhe ushtron kompetencat ekzekutive.
Komisioneri drejton administratën e KQZ-së dhe atë zgjedhore, përfaqëson KQZ-në në marrëdhëniet me të tretët. Mbikëqyr veprimtarinë e administratës zgjedhore, monitoron veprimtarinë e subjekteve zgjedhore, organeve dhe institucioneve shtetërore të medias në lidhje me zgjedhjet dhe referendumet.
Komisionieri ndër të tjera kujdeset për zbatimin e Kodit Zgjedhor në mënyrë të drejtë, të përpiktë, të saktë dhe uniforme nga të gjitha institucionet, subjektet apo personat e ngarkuar me detyra dhe detyrime, sipas ligjit.
Ai ushtron në emër të KQZ-së kompetencat që i ngarkohen asaj me ligje të veçanta, si dhe çdo kompetencë që ky ligj nuk ia njeh shprehimisht Rregullatorit ose KAS-it.
Kuvendi i Shqipërisë me vendimin nr. 56/2020, zgjodhi Komisioner Shtetëror të Zgjedhjeve, z. Ilirjan CELIBASHI.
Zgjedhja e tij në këtë detyrë vjen pas një eksperience të gjatë e të spikatur në fushën e të drejtës, si funksionar i lartë publik, po ashtu edhe si avokat.
Menjëherë pas diplomimit të tij Jurist në vitin 1992 në Universitetin e Tiranës, z. Celibashi u emërua fillimisht gjyqtar në Gjykatën e Rrethit Fier, e më pas Kryetar i Gjykatës së Shkallës së Parë, Mallakastër. Prej vitit 1998 deri në vitin 2001 ai ka shërbyer si Gjyqtar pranë Gjykatës së Apelit, Durrës.
Në vitin 1998 ka ushtruar për disa muaj funksionin si Zëvendësministër i Rendit Publik.
Në periudhën 2001 – 2006, ai ishte kryetar i Komisionit Qendror të Zgjedhjeve. Nën drejtimin e z. Ilirjan Celibashi, KQZ përgatiti dhe administroi zgjedhjet për Kuvendin e Shqipërisë të vitit 2001 dhe 2005, si dhe zgjedhjet për Organet e Qeverisjes Vendore të vitit 2003. Pas mbarimit të mandatit si kryetar i KQZ deri në vitin 2013, ai ushtroi profesionin e avokatit
Në zgjedhjet për Kuvendin e Shqipërisë, të 23 qershorit 2013, z. Celibashi u zgjodh deputet i Kuvendit të Shqipërisë për Qarkun e Fierit, dhe po këtë vit ai emerohet Ministër Shteti për Marrëdhëniet me Parlamentin e Shqipërisë, detyrë që e mbajti deri me 01.08.2014 për t’ju rikthyer profesionit të avokatit.
Ilirjan Celibashi lindi më 2 tetor 1969, në Çorovodë, Skrapar. Ai është i martuar dhe ka një vajzë.